శ్రీచరణి కేక.. 55 పరుగులకే కుప్పకూలిన పాకిస్థాన్

మహిళల ఆసియా కప్ 2026లో భారత మహిళల జట్టు అద్భుత ప్రదర్శనతో అదరగొట్టింది. చిరకాల ప్రత్యర్థి పాకిస్థాన్‌తో గ్రూప్-ఏ మ్యాచ్‌లో బౌలర్లు విశ్వరూపం ప్రదర్శించడంతో పాక్ జట్టు కేవలం 55 పరుగులకే ఆలౌట్ అయింది. భారత స్పిన్నర్ల ధాటికి పాక్ బ్యాటర్లు కనీస ప్రతిఘటన కూడా చూపలేక పెవిలియన్‌కు క్యూ కట్టారు. ముఖ్యంగా, తెలుగమ్మాయి శ్రీచరణి ధాటికి పాక్ టాపార్డర్ విలవిల్లాడింది. శ్రీచరణి తన మొదటి స్పెల్ లో కేవలం 3 పరుగులు ఇచ్చి 3 వికెట్లు నేలకూల్చింది.

దుబాయ్ అంతర్జాతీయ క్రికెట్ స్టేడియంలో జరిగిన ఈ మ్యాచ్‌లో టాస్ గెలిచిన పాకిస్థాన్ కెప్టెన్ ఫాతిమా సనా మొదట బ్యాటింగ్ ఎంచుకుంది. అయితే, ఈ నిర్ణయం పూర్తిగా బెడిసికొట్టింది. ఆరంభం నుంచే భారత బౌలర్లు కట్టుదిట్టమైన బౌలింగ్‌తో పాక్ బ్యాటర్లపై ఒత్తిడి పెంచారు. పవర్ ప్లే ముగిసేలోపే పాకిస్థాన్ కీలక వికెట్లు కోల్పోయి కష్టాల్లో పడింది.

ముఖ్యంగా భారత స్పిన్నర్లు శ్రీ చరణి, ప్రేమా రావత్ తమ మాయాజాలంతో పాక్ బ్యాటింగ్ ఆర్డర్‌ను ఛిన్నాభిన్నం చేశారు. లెఫ్ట్ ఆర్మ్ స్పిన్నర్ శ్రీ చరణి తన 4 ఓవర్లలో కేవలం 7 పరుగులిచ్చి 3 వికెట్లు పడగొట్టగా, లెగ్ స్పిన్నర్ ప్రేమా రావత్ కూడా 9 పరుగులిచ్చి 3 వికెట్లతో సత్తా చాటింది. వీరికి దీప్తి శర్మ (2/5) తోడవడంతో పాకిస్థాన్ ఇన్నింగ్స్ 18.1 ఓవర్లలోనే 55 పరుగుల వద్ద ముగిసింది.

పాక్ జట్టులో షవాల్ జుల్ఫికర్ చేసిన 14 పరుగులే అత్యధిక స్కోరు కావడం వారి బ్యాటింగ్ వైఫల్యాన్ని స్పష్టం చేస్తోంది. మిగతా బ్యాటర్లంతా సింగిల్ డిజిట్‌కే పరిమితమయ్యారు. ఫలితంగా, ఈ మ్యాచ్‌లో విజయం సాధించడానికి భారత జట్టు ముందు 56 పరుగుల అత్యంత సులభమైన లక్ష్యం నిలిచింది.